2016-cı il Milan sərgisində dizayn istiqamətləri – 6 tendensiya...

Bizi əhatə edən dünya  hər il ötən ilkinə nisbətən daha dinamik olur, hiperaktiv həyata çevrilir. Bunun qarşılığında memar-dizaynerlər hər dəfə daha da az funksiyalı evlər yaratmağa üstünlük verir. Müasir evlərin daha rahat, sakitləşdirici abu-havada olmasını zaman özü tələb edir. 

 

Bu fikri yeni yekunlaşmış Milan sərgisinin nəticəsi kimi də qəbul etmək olar.   2016-cı ilin interyerdə istiqamətlərin - tendensiyanın əsas nüanslarını hissələrə ayırsaq:

1-ci 2015-ci ildə olduğu kimi 2016-da da interyer dəbində ekologilik ilk mövqedədir. Ekoloji deyilən interyerdə təbii materiallardan istifadə olunur. Mantar örtüklər, bambuk döşəmə və divar kağızları, formaldehidsiz mebel, tərkibi su əsaslı boyalara üstünlük verilir. Bu zaman yerin təbii resurslarının qorunması da unudulmayıb. Belə ki, köhnə mebeli restovrasiya etmək, masa-stullarda, yumşaq mebelin ayaqlarında, çarpayı və dekorlarda köhnə metallardan istifadə etmək məsləhət görülür.

 

 

2-ci tendensiya ergonomiklikdir. Müasir interyerdə mənasız və faydasız dekor elementlərindən az istifadə olunur. Belə ki, evdə hər bir əşya lazımlı və istifadəyə rahat olmalıdır.  

3-cü tendensiya minimalizm üslubudur. Özünü qohum-qonşuya göstərmək dövrü arxada qaldı. Muzey tipli interyerlər artıq dəbdə deyil. Bağlı dolablardansa açıq rəflərdən daha çox istifadə edin və kiçik məkanınızın necə genişləndiyini özünüz də görəcəksiniz. Ağır klassika bu il heç dəbdə deyil. Daha dəqiq desək eklektika və daha çox fyujn üslubuna yer verilir.

 

4-cü keyfiyyətli istirahət tendensiyasıdır. Müasir dövrün insanları sürətli ritmlə yaşayır və evə ancaq dincəlmək və yatmaq üçün qayıdır. Əksəriyyətimiz belədir. Belə olduğu təqdirdə interyerdə aksenti yataq otağına vermək daha vacib hesab olunur. Məsləhət görülür ki, yataq otağında ortopedik matrasın olmasına, təbii pambıq parçadan yataq örtüyünə, işıqlandırmanın tənzimlənənən olmasına diqqət yetirəsiniz. Səs-küyün də az olmasına diqqət edilməlidir. 

              

5-ci yaşayan mətbəx tendensiyasıdır. Mətbəxdə yaşıllığın yaradılması 2016-ci ilin dəbindədir. Mətbəxdə yaşıllıq yaratmaqla həm təravətli çəmən qoxusu ilə qeyri-adi mətbəxə sahib olarsınız, eyni zamanda ekolojiliyə də riayət edərsiniz.

                

6-cı tendensiya perspektiv görüntülü fotooboylar və tavan üçün şəkilli kağızlardır. 

Ümid edirəm ki, 2016-cı ilin interyer dizayn istiqamətlərindən yararlana biləcəksiniz. Amma unutmayaq ki, ən uğurlu tendensiya dəblə zövqünüzün ahəngidir. Daxilinzə qulaq asın J

Eklektika nədir ki, onu istəyirsiniz, amma cəsarətiniz çatmır?!

İstənilən interyer ev sahibinin simasıdır deyirlər. Hər kəs evini öz zövqünə, rahatlığına, hərdən isə cibinə görə dizayn etdirir. Kimi klassik, etnik üslublu, kimi də müasir interyerdə özünü rahat hiss edir. Amma əksəriyyətimizi klassik üslubun ağırlığı müəyyən müddətdən sonra sıxır, modern interyerin soyuqluğu isə darıxdırır. Bu səbəbdən həm şüuraltı rahatlıq, eyni zamanda daha fərqli, daha yeni dizaynlı interyer istəyirik. Bu zaman dadımıza eklektika çatır.

Eklektika – ayrılıqda bir üslub deyildir, o sadəcə bir neçə üslubu özündə birləşdirir. Nəticədə unikal, təkrarsız, fərqli, qohum-qonşunun evinə bənzəməyən otaq dizaynı ortaya çıxır. Bilirik ki, bizim mentalitetimizdə hamıdan fərqlənmək xüsusiyəti danılmazdır. Buna baxmayaraq bu üslub nəinki bizdə, eləcə də dünyanın bütün ölkələrində xüsusi maraq doğuraraq tələbat halına gəlib çatıb. Nəzərə alsaq ki, belə interyerdə çoxları özünü rahat hiss edir, düşündüm ki, bu sahəyə bir az aydınlıq gətirim.

Bu üslubda interyer dizayn etmək çətin deyil, amma ev sahibindən yetərincə cəsarət tələb edir. Burada bir-birinə zidd, eyni zamanda bir-birini tamamlayan zəngin rəng çalarlarından, ferqli üslubda mebel, dekor və aksessuarlardan istifadə olunur.

Eklektikada əsas nüanslar:

Mebel eklektika üslubunda ən önəmli mövqedədir. bütün digər məişət əşyaları ikinci planın elementləri hesab olunur. Yumşaq mebel seçərkən diqqət edin ki, divan və kreslolar geniş, rahat, sırıqlı arxalıq və əyri kəsilmiş dekorativ ayaqlı olsun. Bu üslub tələb edir ki, dəbli, müasir yumşaq mebelin yanında əntiq masa qoyulsun. Mebelin parçası, tekstura, rəng və dekorativ elementlərinin düzgün seçilməsi eklektik interyerdə mühüm rol oynayır.

Rəng ahənginin təbii çalarlarda olması eklektika üslubunda çox əhəmiyyətlidir. Bu zaman rəng palitrası bir-birinə yaxın deyil, uyğun və kontrasli (təzadlı) olmalıdır. Adətən parlaq və pastel rənglərdən istifadə edilir. Solğun rənglər isə qəti yolverilməzdir. 

Üzlüklər döşəmə üçün ağac tekturalı parket və ya laminat ola bilər. Xalçanın hansı üslubda olması əhəmiyyət daşımır. O istər müasir, istərsə də retro üslubda seçilsin. Divar kağızları qabarıq fakturalı və ya üzəri naxışlı və şəkilli ola bilər.

Aksessuarlar qədimi olsa daha yaxşı olar. Xüsusən də əgər nənənizdən qalıbdırsa. Yox əgər elə əşyanız yoxdursa əntiq əşyalar dükanına baxa bilərsiniz. Bəzən elə olur ki, əşyaya baxırsınız amma sizin interyerə necə yaraşacağıni təsəvvür etmirsiniz. Bir şeydən əmin olun ki, istənilən əntiq əşya eklektik üslublu interyerə çox gözəl yaraşacaqdır.  Xüsusən də qədimi mebel- trümo və ya kamod.

Pərdə və dekorlar. Adətən eklektik interyerdə tünd rəngli və enli qatlamalı pərdələrdən istifadə olunur. Əlavə olaraq saçaq və pərdə tutqaclarından da istifadə etmək olar. Dekor üçün isə istədiyiniz lampa, abajur, tarşer, şəkil çərçivələrindən istifadə edə bilərsiniz. Sadəcə diqqər edin ki, bu elementlər ümümi intetyerlə kontrast təşkil etsin. Nümunə olaraq demək istirəm ki, atlas fakturalı parçalar metal tarşerlə ahəng yarada bilir.

Rahat və komfortlu həyat arzulayıram!